काठमाडौं । नेपाल निर्माण व्यवसायी महासंघले प्रत्येक प्रदेश सरकारलाई कोरोना भाईरस कोभिड–१९ नियन्त्रण तथा रोकथामका लागि रू १३ लाखका दरले रू ९१ लाख सहयोग गरेको छ। सबै निर्माण व्यवसायीहरूको निर्माण कार्यको बिलबाट कट्टा गरि जम्मा भएको निर्माण व्यवसाय विकास परिषद् अन्तर्गत रहेको निर्माण व्यवसायी कोषबाट खर्च हुने गरि कोरोना भाइरस (कोभिड-१९) को बढ्दो संक्रमण रोकथाम तथा नियन्त्रणका लागि सात वटा प्रदेश सरकारलाई उक्त रकम सहयोग गर्ने निर्णय भएको हो । यो सहयोग रकम महासंघ अन्तर्गतका प्रदेश निर्माण व्यवसायी महासंघको अनुरोध र समन्वयमा भएको हो ।

साथै यस अघि पनि महासंघले कोरोना भाइरस (कोभिड-१९) को बढ्दो संक्रमण रोकथाम तथा नियन्त्रणका लागि केन्द्र सरकारले स्थापना गरेको कोषमा एक करोड रुपैयाँ सहयोग गरेको महासंघले जनाएको छ । यसरी दुई पटक गरि महासंघले कोरोना भाइरस (कोभिड-१९) को बढ्दो संक्रमण रोकथाम तथा नियन्त्रणका लागि जम्मा १ करोड ९१ लाख रूपैयाँ सहयोग गरेको छ ।

साथै महासंघ अन्तर्गतका प्रदेश महासंघ, जिल्ला संघ, वस्तुगत संघ र एशोसिएट निर्माण व्यवसायी फर्म कम्पनी सदस्यहरूलाई देशभर आआफ्नो ठाउँबाट स्वास्थ्य सुरक्षा अपनाई यस कोरोना भाईरसबाट पिडितलाई राहत र यसको रोकथामको लागि सक्दो सहयोग गर्न समेत महासंघ अनुरोध गरेको छ ।