नेपाली बजारका नामी चुरोटको भारतमा नक्कली उत्पादन हुने गरेको पाइएको छ । भारतमा नेपाली नाम र ब्रण्डको चुरोट दुरुस्तै नक्कल गरी उत्पादन गर्ने र नेपालमा सस्तो मूल्यमा भित्र्याइने गरेको खुलेको छ ।

सोमबार सशस्त्र प्रहरीले विराटनगर भन्सार नाका हुँदै नेपाल भित्र्याइएका २ सय बट्टा खुकुरी चुरोट नियन्त्रणमा लिएपछि भारतमा उत्पादित नक्कली चुरोट नेपालका बजारमा आउने गरेको खुलेको हो ।

बरामद गरिएका गोल्ड स्टेप टोब्याको प्रालिको उत्पादन नक्कली खुकुरी चुरोट सशस्त्र प्रहरीको विराटनगर गुल्मले सोमबार नै भन्सार कार्यालयमा बुझाएको छ । गोल्ड स्टेप टोब्याको प्रालि गुगलमा सर्च गर्दा भारत बिहारको राजधानी पटना ठेगाना देखिन्छ । सो उद्योग निजी क्षेत्रका व्यवसायीको साझेदारीमा सञ्चालित रहेको देखिएको छ ।

भन्सार कार्यालयले भने सो चुरोट लिलामी प्रक्रियामा लैजाने तयारी गरेको छ । भारतमा उत्पादित नक्कली चुरोट नेपालको भन्दा एक बट्टामा ३० रुपैयाँ सस्तो छ ।

विराटनगर भन्सारका अनुसार भारतमा उत्पादित पान मसला रजनीगन्धा र तुलसी पनि नक्कली बनाएर नेपाल भित्रिने गरेको छ । यस अघि विराटनगर बजारबाटै नक्कली रजनीगन्धा र तुलसी नियन्त्रणमा लिएर कारबाही गरिएको छ ।