काठमाडौं । कोरोना भाइरसको जोखिम बढेसँगै सरकारले मंगलबार देखि लागु हुने गरी एक साताका लागि लकडाउन गरेको छ । तर, एकसातामै लकडाउन खुल्ने संकेत देखिएको छैन । परिस्थिती हेरेर लकडाउन लम्बिन सक्ने उपप्रधानमन्त्री एवम् रक्षामन्त्री ईश्वर पोखरेलले बताएका छन् ।

उपप्रधानमन्त्री पोखरेलले आकस्मिक रुपमा आइपरेको परिस्थितिका कारण यस्तो भएकाले अहिले नै अनुमान गर्न नसकिने बताए ।

‘११ गतेदेखि १८ गतेसम्मको लागि लकडाउन गरेका छौं । यसबीचको सबै घटनाक्रमलाई हामी सुक्ष्म अध्ययन गर्छौं । उच्चस्तरीय राजनीतिक समन्वय समितिका संयोजक समेत रहेका उपप्रधानमन्त्री पोखरेलले भने,‘यो त आँकलन गर्न सक्ने अवस्था छैन, कुन ढंगले अगाडि बढ्छ त्यसका आधारमा हाम्रा योजना तय गर्दै जान्छौं ।’ साथै जनतालाई खाद्य सामाग्रीको अभाव हुन नदिने प्रतिबद्धता समेत पोखरेलले जनाएका छन् ।