काठमाडौं । लकडाउनका कारण सीमामा अलपत्र परेका नेपालीहरुलाई सरकारले स्वदेश प्रवेश गर्न दिने भएको छ ।

मंगलबार बसेको कोरोना रोकथामसम्बन्धी उच्चस्तरीय समितिको बैठकले सीमामा अलपत्र परेका नेपालीलाई परिचय पत्र हेरेर १४ दिन क्वारेन्टाइनमा बस्ने शर्तमा आज अन्तिम पटक नेपाल आउन दिने निर्णय गरेको हो ।

नाकाबाट आएका नेपालीहरुले १४ दिन क्वारेन्टाइनमा बस्नु पर्नेछ । त्यसका लागि प्रदेश सरकारले स्थानीय प्रशासनसँग समुन्वय गरेर व्यवस्था मिलाउने जनाइएको छ ।

मंगलबार बिहान ६ बजेदेखि लक डाउन भएपछि सयौं नेपालीहरु नाकामै रोकिएका छन् । यसअघि भारतबाट आएका ठूलो संख्याका नेपालीलाई प्रहरीले कञ्चनपुरको गड्डाचौकी नाकामै रोकेपछि तनाव उत्पन्न भएको थियो ।