प्रतिष्ठित संचारमाध्यम फ्रान्स फुटबलले विश्व फुटबलमा सर्वाधिक कमाई गर्ने चार खेलाडीको नाम सावर्जनिक गरेको छ ।

अध्ययनले बार्सिलोनाका लियोनल मेस्सी, युभेन्ट्सका क्रिस्टियानो रोनाल्डो, पीएसजीका नेयमार र रियल मड्रिडका ग्यारेथ बेल विश्वका सर्वाधिक कमाई गर्ने खेलाडीको शीर्ष चारमा राखेको छ ।

अध्ययनले पछिल्लो सिजनमा कमाएको बोनसलाई आधार मानेर उनीहरूलाई सर्वाधिक कमाई गर्ने खेलाडीको शीर्ष चारमा राखेको जनाएको छ । रिपोर्टका अनुसार बार्सिलोनाका स्टार खेलाडी लियोनल मेस्सीको कुल वार्षिक आय १४१ मिलियन अमेरिकी डलर गणना गरेको छ । रिपोर्टले मेस्सीलाई रोनाल्डो भन्दा अघि राखेको छ ।

पोर्चुगिज स्टार रोनाल्डोको फुटबलबाट वार्षिक कमाई १२७ मिलियन अमेरिकी डलर रहेको जनाएको छ । उनी विश्वका सर्वाधिक कमाई गर्ने खेलाडीको दोस्रो स्थानमा रहेका छन् ।

त्यस्तै पेरिस सेन्ट जर्मन (पीएसजी) तथा ब्राजिलियन स्टार स्ट्राइकर नेयमार १०२ मिलियन अमेरिकी डलरसहित तेस्रो स्थानमा छन् । नेयरमा २०१७ मा विश्व कीर्तिमानी मूल्यमा बार्सिलोनाबाट पीएसजी पुगेका थिए ।

वेल्स तथा रियल मड्रिड स्ट्राइकर ग्यारेथ बेल ४१.७ मिलियन अमेरिकी डलरसहित चौथो स्थानमा छन् । त्यस्तै प्रशिक्षकमा एट्लेटिको मड्रिडका डिएगो सिमोनको ४३.७ मिलियन अमेरिकी डलर सहितशीर्ष स्थानमा रहँदा इन्टर मिलानका एन्टोनियो कोन्टेको ३२.३ मिलियन अमेरिकी डलरसहित दोस्रो र म्यानचेस्टर सिटीका पेप गार्डियोला २९ मिलियन अमेरिकी डलर सहित तेस्रो स्थानमा रहेका छन् ।