काठमाडौँ, १० चैत

विश्वमा महामारीको रुपमा फैलिएको कोरोना भाइरस (कोभिड–१९) का कारण अन्तर्राष्ट्रिय ओलम्पिक कमिटि (आईओसी) ले चार महिनापछि जापानको टोकियोमा हुने तय भएको विश्व खेलकुदको कुम्भ मेला टोकियो ओलम्पिक सार्ने तयारी गरेको छ ।
आईओसीले ओलम्पिक स्थगित गर्ने वा केही महिना पछि गर्ने भन्ने विषयमा निर्णय लिनको लागि चार हप्ताको समय लिएको छ ।

विश्वभरका एथ्लेटिक्स संघ र राष्ट्रिय ओलम्पिक कमिटिको दबाबबीच आईओसीको कार्यकारी बोर्डको आइतबार बसेको बैठकले तत्काल ओलम्पिक स्थगित गर्ने समय नरहेको र यसका लागि चार साताको समय लिइएको बताएको छ । राष्ट्रिय ओलम्पिक कमिटिहरुले ओलम्पिक सार्न आईओसीमाथि दबाब बढाईरहेका छन् ।

‘विश्व अहिले असामान्य स्थितिमा छ । बोर्डले आज आईओसीको परिदृष्यको योजनाको अर्को कदम सुरु गरेको छ । यी परिदृष्य सन् २०२० को जुलाई २४ देखि अगाडी बढ्नका लागि सञ्चालनमा रहेका योजनाहरु परिमार्जन गर्न र खेलको सुरुको मिति परिवर्तन गर्न सम्बन्धित छ ।’ बैठकको निर्णयमा भनिएको छ । ‘रद्ध गर्ने कार्यसुचि हैन । तर स्केल्ड डाउन खेलहरु पनि विचार गरिनेछ । प्रतियोगिता केही महिना स्थगित वा पुरै बर्ष भन्ने बिषयमा निर्णय हुन सक्ने बताईएको छ ।’

आइओसीका अध्यक्ष थोमस वाचले बैठकको निर्णयबारे जानकारी दिदै तत्काल ओलम्पिक स्थगित गर्ने निर्णय नभएको र स्थगित गर्नु मात्रै समस्या समाधानको विषय नहुने बताउँदै त्यसका लागि चार साताको समय लिइएको प्रस्ट पारे । जापानले टोकियो ओलम्पिक निर्धारित समयमा गर्न आफु प्रतिबद्ध रहेको बताएको थियो । जापानले ओलम्पिक टर्च ग्रीसबाट आफ्नो देशमा ल्याइसकेको छ । शनिबार मात्रै जापानमा ओलम्पिक टर्च सार्वजनिक गरिएको थियो ।

बेलायत ओलम्पिक कमिटिका अध्यक्ष सर ह्युग रोबर्टसनले आईओसीको कार्यकारी बोर्डको निर्णयको स्वागत गर्दै हामीले गरेको ओलम्पिक खेलको स्थगनको सन्दर्भमा सकरात्मक निर्णयको पर्खाइमा रहेको बताएका छन् । उनले एथ्लेटिक्सको सन्दर्भमा भने छिटो निर्णय गर्न आग्रह गरेका छन् ।

बेलायत लगायत करिव १ सय बढी ओलम्पिक कमिटिले खेल स्थगित गर्न आईओसीलाई सुझाव दिदै आएका छन् । कोरोना भाइरसकै कारण युरोपियन फुटबलको सर्वाेच्च निकाय (युइएफए)ले २०२० जुनमा तय भएको युरोकप र दक्षिण अमेरिकी फुटबल एसोसिएसनले जुनमा नै तय भएको कोपा अमेरिका कप एक वर्षको लागि स्थगित गरिसकेको छ । अन्य खेलकुद पनि ठप्प प्रायः छ ।