काठमाडौं । बजारमा मास्कको चरम अभाव भइरहेका बेला कालाबजारी गर्ने उदेश्यले लुकाएर राखिएको १० लाख थान मास्क सहित एक व्यक्ती पक्राउ परेका छन् ।

पक्राउ पर्नेमा गोरखाका युवराज न्यौपाने रहेको नेपाल प्रहरीको महानगरीय अपराध महाशाखाले जनाएको छ । महाशाखाबाट परिचालन भएको टोलीले सानो भर्‍याङबाट न्यौपानेलाई बुधबार पक्राउ गरेको हो ।

महाशाखाका प्रमुख प्रहरी वरिष्ठ उपरीक्षक सकुलबहादुर थापाले कृत्रिम अभाव सिर्जना गर्ने तथा अत्यावश्यक वस्तु लुकाउनेहरुविरुद्ध प्रहरी टोली सक्रियताका साथ लागेको बताए ।

प्रहरी टोलीले मङ्गलबार राति सुरज आर्केडबाट एक हजार ६०० थान स्यानिटाइजर र काठमाडौं उपत्यकाका विभिन्न भागबाट १४ हजार थान मास्क बरामद गरेको थियो ।