काभ्रेको पनौतीमा टिपरको ठक्करबाट आमा-छोरीको मृत्यु भएको विरोधमा स्थानीय आन्दोलित भएपछि स्थानीय प्रशासनले अनिश्चितकालका लागि कर्फ्यु लगाएको छ।

पनौती बसपार्कमा सोमबार साँझ बा ५ ख ५४८० नम्बरको टिपरले ठक्कर दिँदा खानीखोला गाउँपालिका वडा नम्बर १ की ३३ वर्षीया जुनीमाया गोले र उनकी ३ वर्षीया छोरी स्मारिकाको मृत्यु भएको थियो।

घटनाको विरोधमा आगजनी र तोडफोडको शृंखला बढेपछि काभ्रेपलाञ्चोक जिल्ला प्रशासन कार्यालयले अनिश्चितकालिन कर्फ्यु आदेश जारी गरेको हो। मंगलबार बिहान ९ बजेदेखि लागू हुने गरी पनौती नगरपालिकाका चारकिल्ला तोकेर कर्फ्यु लगाइएको छ।

काभ्रे प्रशासनले पनौतीको पूर्व शंख जानेबाटोको चौकीसम्म ८०० मिटर क्षेत्र र पश्चिममा कुशादेवी जानेबाटोको १ किलोमिटरसम्म तथा बनेपा जाने ठाडोबाटोको १ किलोमिटर क्षेत्र र देखाञ्चोकतर्फको १ किलोमिटर मिटर क्षेत्रमा कर्फ्यु लगाएको हो।

घटनालगत्तै विरोधमा उत्रिएका स्थानीय बासिन्दा र प्रहरीबीच झडप हुँदा ४ प्रदर्शनकारी र ३ प्रहरी घाइते भएका थिए। आक्रोशित स्थानीय बासिन्दाले प्रहरी बिटमा आगजनी समेत गरेका छन्।