काठमाडौँ । भ्रमण वर्षको असफलतासँगै सरकारले भ्रमण दशक २०२१-२०३० को तयारी थाल्ने भएको छ ।

आइतबार संस्कृति, पर्यटन तथा नागरिक उड्डानमन्त्रालयमा आयोजित एक कार्यक्रममा बोल्दै पर्यटन मन्त्री योगेश भट्टराईले उक्त कुराको जानकारी दिएका हुन् ।

उनले कोरोना भाइरसका कारण भ्रमण वर्ष स्थगित गर्नुपरेकोमा दुख पोख्दै ‘नेपाल भ्रमण वर्ष -२०२० लाई औपचारिक रूपमा स्थगित भएको जानकारी दिएका थिए । कार्यक्रमलाई सम्बोधन गर्दै मन्त्री भट्टराईले भ्रमण वर्ष स्थगित भए पछि अब भ्रमण दशकका लागि छलफल भइरहेको जानकारी दिएका हुन् ।

मन्त्री भट्टराईले भने ‘कोरोना भाइरसको सङ्क्रमणका कारण हामी भ्रमण वर्षलाई रि सेड्युअल गर्नुपर्ने अवस्थामा आइपुग्यौँ, अब हामी २०२० लाई भ्रमण वर्ष भनेर हिँड्दैनौ, यसका सम्पूर्ण कार्यक्रमहरू रद्द भइसकेका छन् ।’ उनले थपे ‘अब भ्रमण वर्षको साटो २०२१ देखि २०३० सम्म भ्रमण दशक मनाउनको लागि छलफल भइरहेको छ।’