कपिलवस्तु । १४ वर्षीया बालिकालाई जबर्जस्ती करणी गरेको मुद्दामा एक युवकलाई १२ वर्षकाे सजाय भएको छ । बुद्धभूमि नगरपालिका–९ इमिलियाका १८ वर्षीय योगेश श्रेष्ठलाई बुधबार जिल्ला अदालत कपिलवस्तुले १२ वर्षकाे सजाय फैसला गरेको हो ।

श्रेष्ठलाई १२ वर्ष कैद र एक लाख क्षतिपूर्तिको फैसला भएको छ । जिल्ला अदालत कपिलवस्तुका न्यायाधीश लोकजङ्ग शाहको इजलासले फैसला गरेको हो ।

अदालतका स्रेस्तेदार चिन्तामणि शर्माका अनुसार ती बालिकालाई बलात्कार गर्ने अन्य ४ बालकलाई भने आठ वर्ष बालसुधार गृहमा राख्ने फैसला भएको छ । २०७५ माघ र फागुनमा छुट्टाछुट्टै समयमा ती बालिकालाई ६ जनाले ललाइफकाई जबर्जस्ती करणी गरेका थिए । बालिकाले डर त्रासका कारण त्यसबारे घरमा कसैलाई जानकारी दिएकी थिइनन् ।

घटनापछि बालिकाले ३ महिनाको गर्भ बोकेको कुरा स्वास्थ्य जाँचका क्रममा भेटिएको थियो । पीडितकी आमाले २०७६ वैशाख ११ मा छोरीलाई ६ जनाले बलात्कार गरेको किटानी जाहेरी दिनुभएको थियो । सोही आधारमा घटनाका मुख्य आरोपी श्रेष्ठ पक्राउ परेका थिए । बालिकालाई नगरपालिका–२ गोरुसिङ्गेस्थित रोयल खुस्बु होटलमा लगी बलात्कार गरिएको थियो । होटलका मालिक नगरपालिका–९ इमिलियाका युवराज भुसाल जैसीले बालिकालार्ई बलात्कार गरेका थिए । किटानी जाहेरी परेदेखि उनी फरार रहेको प्रहरीले जनाएको छ । उनको मुद्दा मुल्तबी राखिएको स्रेस्तेदार शर्माले जानकारी दिनुभयो ।