धरान । सियोन स्कुलका एक शिक्षक (होस्टल वार्डेन) ले एसइइ परीक्षाको तयारी गरिरहेकी एक छात्रालाई यौन दुर्ब्यहार गरेको खुलेको छ । केहि महिनाअघि मात्र घटेको घटना ढाकछोप गर्न उनले ती छात्रालाई विभिन्न प्रलोभन समेत दिएका छन् ।

शिक्षकले होस्टल भित्रै ती छात्रालाई यौन हिंसा गरेपछि उनी होस्टल नै छाडेर घरबाटै एसइइको तयारी गरिरहेकी छिन् । उनीसँगैका अन्य एसइइ दिने विद्यार्थीलाई स्कुलले अनिवार्य होस्टल राखेको छ ।

पहिला पढाई राम्रै भएपनि घटना घटेपछि ती छात्राको पढाई समेत कमजोर भएको उनकै सहपाठीहरुले बताएका छन् । ‘उनी अहिले स्कुल जान समेत रुचाउँदिनन् । एकोहोरो जस्तै भएकी छिन् ।’ उनकै कक्षामा अध्ययनरत एक विद्यार्थीले बताए । छात्राकाे पढाइ विग्रने डरले अभिभावकले याे विषय बाहिर ल्याउन सकिरहेका छैनन् ।

धरान–१६ स्थित सियोन स्कुलका डाइरेक्टर खड्ग थापा मगरका आफ्नै भाइ हेमन्त थापा (वार्डेन)ले होस्टलमा बस्ने ती छात्रालाई विभिन्न प्रलोभन देखाई यौन हिँसा गरेका हुन् । उनले ती १५ वर्षिया छात्रालाई घर, गाडी र पैसा समेत दिने प्रलोभन समेत दिएका छन् । विवाहित हेमन्तले होस्टलमा रहेका अन्य किशोरीहरुलाई पनि गलत मनसायले छुने, नजिक हुन खोज्ने, एकान्तमा रहेका छात्राहरुलाई छोप्ने जस्ता कूकृत्य गरेपनि स्कुल ब्यवस्थापनले कुनै कारवाही गर्न सकेको छैन ।

घटना घटेपछि छात्राका अभिभावकले स्कुलका डाइरेक्टर तथा प्रिन्सिपलसँग कुरागर्दा एक पल्टलाई माफि मगाएर घटना लुकाईको स्रोतको दावि छ । विगतमा पनि शिक्षक थापाले स्कुलमा रहेका छात्राहरुमाथि गिद्दे नजर लगाउँदै आएका थिए । स्कुलमा पटक-पटक छात्राहरु माथि यौन दुर्ब्यहार भइरहँदा ती शिक्षकलाई कारवाही नहुनुमा स्कुलकै गलत नियत देखिएको महिला अधिकारवादीहरुले बताएका छन् ।

दुई वर्षअघि ती शिक्षकले कक्षा ५ मा अध्ययनरत एक बालिकामाथि होस्टलमा कोही नभएको मौका छोपी दुर्ब्यहार गरेका थिए । होस्टलमा एक्लै बसिरहेकी ती बालिकालाई गएर हातपात गर्न थालेपनि उनी चिच्याउँदै भागेर कक्षा १० मा अध्यनतरत विद्यार्थीसँग बसेपछि बचेकि स्रोतको दावि छ । ‘सियोन स्कुलमा पटक-पटक यस्ता घटना घटिरहेका छन्, दुई वर्षअघि ५ कक्षामा पढ्ने बालिकालाई त्यहि शिक्षकले यौन दुर्ब्यहार गरेपछि स्कुल प्रशासनले निकालिदिएको थियो । तर, ती शिक्षक स्कुलकै डाइरेक्टर खड्ग थापा मगरका भाइ रहेछन्, उनले फेरी स्कुल वार्डेन बनाएर राखे ।’ स्रोत भन्दछ ।

उक्त घटनामा धरानका महिला अधिकारवादीहरु सविता राई, चेतना श्रेङ, शिला बज्राचार्य लगायतले घटनामा संलग्नलाई कारवाहीको माग गर्दै आवाज उठाएका थिए ।

स्कुलमा किशोरी छात्रामाथि यौन दुर्ब्यहार भएपनि स्कुलका प्रिन्सिपल संजिव वान्तवा राईले किशोरीलाई नै दोषि देखाए । उनले ती किशोरीले होस्टलमा बसेर पढन नचाहेर शिक्षकलाई दोष लगाएको जिकिर गरे । ‘उसलाई होस्टलमा बस्न मन नभएर वार्डेनमाथि दोष लगाइन्, त्यस्तो केही गरेको छैन ।’ प्रिन्सिपल राईले भने ।

याैन दुर्ब्यहार भएको कुरा आएपछि स्कुलले छात्रा र होस्टल वार्डेनलाई सँगै राखेर कुरा गर्दा होस्टल वार्डेन हेमन्त थापा मगरले छात्रामाथि कुनै दुर्ब्यहार नगरेको बताएको र छात्राले घटना स्कुलमा भन्नुभन्दा पनि घरमा गएर अभिभावकलाई भनेकोले छात्रा नै दोषि देखिएको प्रिन्सपलकाे भनाइ छ । ‘यो विषयमा तपाईंहरुसँग बसेरै कुरा गर्दा ठिक हुन्छ, उहाँले त्यस्तो गर्नुभएको छैन । त्यो छात्रा नै गलत छिन् ।’ प्रिन्सपलले होस्टल वार्डेनको बचाउ गर्दै भने ।

यता यहि विषयमा कुरा गर्न स्कुलका डाइरेक्टर खड्ग थापा मगरलाई पटक-पटक फोनगर्दा उनले फोन उठाएनन् । भने, उनका भाई होस्टल वार्डेन हेमन्त थापा मगरले पनि सम्पर्कमा आएनन् ।

 समाचारमा पिडित छात्रा तथा अभिभावकको नाम ठेगाना गोप्य राखिएको छ ।