एजेन्सी । भारतीय जनता पार्टी (बिजेपी) का एक नेताले रामका भक्त हनुमान मुसलमान रहेको बताएका छन । बिजेपी नेता एमएलसी बुक्कल नवाबले हिन्दु धर्मग्रन्थ रामायण अनुसार रामको भक्त रहेका पवनपुत्र हनुमान मुसलमान जातिको रहेको दाबी गरेको हुन ।

उत्तर प्रदेशमा आयोजित एक कार्यक्रममा बुक्कलले रहमान, रमजान, फरमान, जीसान र कुर्वान जस्ता नाम मुस्लिम समुदायको रहेको भन्दै उस्तै सुनिने हनुमान मुसलमान जातिको रहेको दाबी गरेका हुन ।

नवभारत टाइम्सलाई उद्धृत गर्दै बिबिसी हिन्दीले आफ्नो अनलाइन संस्करणमा लेखेको छ ‘बुक्कलका अनुसार हनुमानको नाम इस्लामका धेरै नामहरुसंग मिल्दो छ ।’ बुक्कलको सो भनाईको समर्थन र विरोधमा विभिन्न प्रतिक्रियाहरु आइरहेको छ ।

रामका भक्त हनुमानको जातका विषयमा भारतमा धेरैखाले मतहरु सार्वजनिक भइरहेका छन । यसअघि समाजवादी पार्टीका नेताहरुले हनुमान ‘दलित’ तथा एक मन्त्रीले ‘जाट’ रहेको बताएका थिए ।