काठमाडौं । चीनको वुहान क्षेत्रबाट फैलिएको कोरोनाभाइरसको असर नेपाल प्रहरीमा पनि पर्न सक्ने भएकाले सतर्कता अपनाइएको छ । सुरक्षा संगठन समूहमा रहने भएकाले सम्भावित खरताबारे समयमै सतर्कता अपनाइएको हो । प्रहरीले तालिम, गस्ती, छापा हान्ने लगायतका कार्य समूहमा गर्दै आएको छ । यसबाहेक सभा सम्मेलन, भिडभाड हुने स्थानमा समेत प्रहरीको उपस्थिति रहने गर्छ ।

प्रहरी प्रवक्ता डीआईजी प्रस्तावित एआइजी शैलेश थापा क्षेत्रीका अनुसार प्रहरी अस्पताल र प्रहरी प्रधान कार्यालयमार्फत स्वास्थ्य आन्तरिक रुपमा स्वास्थ्य सचेतना सुरु गरिएको बताए । उनले भने, ‘‘विमानस्थल, ट्राफिक चेकिङ र प्रहरीले भिडभाडमा ड्युटी गर्ने सम्भावित स्थानमा मास्क लगाउन भनेका छौं । त्यसबाहेक साबुनपानीले हात घुने, स्वास्थ्यमा समस्या देखिए स्वास्थ्य परीक्षण लगायतको व्यवस्था गरेका छौं ।’’

सकेसम्म हात नमिलाउन र नमस्ते गर्न समेत निर्देशन दिएको छ । चिकित्सकले समेत नमस्ते गर्न सुझाव दिँदै आएका छन् । आन्तरिक रुपमा अभिवादन गर्ने भए पनि कतिपय अवस्थाले सेवाग्राही वा अन्य याक्तिसँग हात मिलाउनुपर्ने भए पनि सकेसम्म हात नमिलाउने निर्देशन दिइएको प्रवक्ता क्षेत्रीले बताए ।

उनका अनुसार कोरोनाकै प्रभावका कारण यही फागुन २३/२४ गते सुदूरपश्चिम प्रदेशको धनगढीमा हुन लागेको सुरक्षा गोष्ठी समेत तत्कालका लागि स्थगित गरिएको छ ।

यस्तै कोरोनाकै प्रभावको सबैभन्दा ठूलो असर प्रहरीको मापसे चेकिङमा देखिएको छ । कोरोना संक्रमणको त्रासका कारण ट्राफिक प्रहरीले चेक गर्दै आएको मापसे परीक्षणमा असर परेको हो । ट्राफिक प्रहरीसँग पर्याप्त मात्रामा ब्रेथलाइजर मेसिन नभएका कारण कैयौं स्थानमा मुखले सुँघेर पनि मापसे चेक गर्दै आएको थियो ।

तर अहिले उक्त प्रक्रिया रोक्नुपरेको ट्राफिक प्रहरी महाशाखाका प्रमुख भीम ढकालले बताए ।

नजिकै गएर चेक गर्नुपर्ने भएकाले कोरोनाभाइरसको संक्रमण भएको भए असर गर्न सक्ने भन्दै त्यसको विकल्पमा छलफल भइरहेको प्रहरीले जनाएको छ ।